Cun far urden en tschaler e sin palantschin chattan ins mintgatant veglias fotografias da famiglia u era documents. Sche quels guardan ora impurtant, sa dumondan ins tgi ch’ins ha da contactar. En Engiadin’Ota è quai l'incumbensa da l'archiv cultural a Zuoz.
Chattà tschintg documents istorics
Uschè in cas è capità dacurt en l'Engiadina: In tschegn or da la populaziun ch'ins haja chattà documents vegls tar ina rumida. Uschia ha l'archiv cultural d’Engiadin’Ota tramess in collavuratur a guardar tge palpiris vegls che quai sajan. Svelt saja stà cler che quests documents sajan impurtants, uschia Luzian Schucan, president da l'archiv cultural d'Engiadin'Ota.
Documents pensads pers
Pli tard era lura cler ch'in dals tschintg palpiris era ina copia contemporana da la brev da las Trais Lias d'avant 500 onns. Sco quai ch’igl è sa mussà eran tuts tschintg documents or da l’archiv da la regiun Malögia. Badà che quests documents manchian, hajan ils responsabels pir avant dapli che 10 onns cura che l’archiv ha fatg midada da Zuoz a Samedan, uschia Jenny Kollmar, manadra da gestiun tar la regiun Malögia.
Surdada e digitalisar ils documents
Ils tschintg documents istorics èn uss puspè en l'archiv da la regiun. Proximamain duain quels vegnir digitalisads. Per il cas ch'insatge capita cun ils documents originals, è ina copia precisa salvada.
