Il mais da zercladur stat sut l'ensaina dal tir. A Zuoz ha gì lieu questa fin d'emna la festa uffiziala da la 26avla festa chantunala da tir.
Represchentantas e represchentants da la politica e dal militar e numerusas tiraduras e tiradurs èn sa scuntrads sonda a Zuoz per festivar ed onurar la pli veglia tradiziun da la Svizra, il tir.
En tut sa participeschan durant trais fins d’emna 8’000 tiraduras e tiradurs – sin 15 differents stans da tir da Samignun fin en Val Müstair e da l'Engiadina fin en las valladas dal sid. Quai vul era dir che almain 8’000 armas e var 11 tonnas muniziun d’ordonanza èn en circulaziun.
L'aspect da la segirtad vegn scrit fitg grond. Quest onn datti in novum: la controlla uffiziala d'armas a Zuoz.
Mintga tiradur sto mussar ses cudeschet e survegn be tanta muniziun sco annunzià. Ed avant d'entrar en il stan da tir vegn mintg'arma controllada anc ina giada dal primtiradur.
Ils ferrers d'armas professiunals controllan mintga singula arma per donns e sch’ella correspunda a las normas prescrittas. Sche quai n'avess betg d'esser il cas, na dastga il tiradur u la tiradura betg far part a la concurrenza cun questa arma.
Tar il tir surveglian l'avertider ed il primtiradur mintgamai dus tiradurs u tiraduras per che tuts resguardian las reglas e ch’ins possia porscher la pli gronda segirtad pussaivla.
La lavur da team è il pli impurtant per garantir la segirtad, e quatter egls vesan dapli che dus.
