La regenza taliana renunzia da construir ina bobera a Cortina per ils gieus olimpics dal 2026 a Milaun. Quai ha annunzià il president dal Comité olimpic naziunal talian durant l'inscunter dal Comité internaziunal olimpic a Bombay en l'India. Ins saja vi dad examinar tut las schliaziuns pussaivlas.
Gia dumandà hajan ils organisaturs dals gieus olimpics dal 2026 la vischnanca da San Murezzan. Era interessada da metter a disposiziun sia bobera saja la citad austriaca Innsbruck.
Cursas da bob per ils gieus olimpics talians forsa a San Murezzan
La vischnanca da San Murezzan è vegnida dumandada dals organisaturs dals gieus olimpics 2026 a Milan e Cortina d'Ampezzo en l'Italia, sche las cursas da la disciplina bob pudesasn avair lieu sin la bobera da San Murezzan. Il motiv ch'ils organisaturs dals gieus han dumandà San Murezzan saja ch'i na dettia nagina bobera en l'Italia. Ina nova bobera stuess vegnir construida en l'Italia entaifer dus onns, ed ils custs fissan radund 90 milliuns francs, declera il president communal da San Murezzan Christian Jott Jenny.
Il chantun duai schliar il problem dal traffic
La vischnanca da San Murezzan saja senz'auter pronta da metter a disposiziun la bobera per ils gieus olimpics 2026, agiunta Jenny. Sco proxim stoppia dentant il chantun Grischun prender posiziun, oravant tut per chattar ina soluziun cun il traffic. Las colliaziuns tranter Livigno e l'Italia, nua che differentas concurrenzas vegnan ad avair lieu, e l'Engiadin'Ota èn fitg restrenschidas. Christian Jott Jenny spetga qua ina soluziun pragmatica per che San Murezzan possia sustegnair la dumonda dals organisaturs dals gieus olimpics 2026.