Ils curs e referats ch’eran previs er durant il 64avel onn d’existenza da la «Chasa Fliana», han da vegnir spustads sin l’onn proxim. Quai ha decis la suprastanza da la fundaziun ensemen cun il comité che organisescha ils curs.
Memia pauc spazi
Per pudair tegnair en las prescripziuns da segirezza en connex cun il coronavirus, avess la fundaziun da garantir spazi avunda per las radund 60 dunnas ch’avessan visità quest onn ils curs e referats. La sala da gimnastica a Lavin è dentant occupada quest onn dals scolars da Zernez, causa che la sala a Zernez vegn actualmain sanada.
Gruppa da ristg
La gronda part da las participantas dals curs a Lavin èn dunnas. Lur vegliadetgna è en media sur 65 onns. Quai saja stà in ulteriur argument per decider da desister quest onn, uschia Christiana Willy, commembra dal comité che organisescha ils curs a Lavin.
Nus n’avessan era betg savì quantas che fissan vegnidas quest onn als curs.
La decisiun da stritgar quest onn ils curs, saja finalmain stada unanima. In avantatg dettia perfin er anc: ils organisaturs dals curs dal onn proxim han gia pront il program. Pli u main tut ils referents ch’eran previs per quest onn, hajan gia garantì lur preschientscha il 2021.
Ils curs da la Chasa Fliana avessan gì lieu mintga mardi dals 20 d’october fin ils 8 da december 2020.