Cruschada a Zuoz vegn midada en rundella
La via d'Engiadina a Zuoz po vegnir sanada e renovada sin ina lunghezza da 600 meters. La regenza grischuna ha dà glisch verda al project che duai tranter auter gidar da sminuir il dumber d'accidents sin quest traject. Or da la cruschada duai dar ina rundella. Ils custs totals per renovar quest punct central da traffic muntan a 7,4 milliuns francs, bun 5,4 da quels surpiglia il chantun. Il project, che vegn realisà en collavuraziun cun la vischnanca da Zuoz, prevesa dasper la sanaziun da la via er da stgaffir plazzas da parcar e da sanar las lingias industrialas.
4 projects per la protecziun cunter canera
La regenza approvescha quatter projects da sanaziun cunter la canera en las vischnancas da Seglias, da Tumleastga, da Lantsch e da Masein. Tut ils projects sa basan sin l'obligaziun da sanaziun tenor la legislaziun federala davart la protecziun cunter canera. Sin fundament dal surpassament da las limitas d'immissiuns exista in basegn da sanaziun per tschertas vias en las vischnancas surmenziunadas. Il chantun e las vischnancas sco partidas da proprietad da las vias correspundentas èn obligads da realisar la sanaziun cunter la canera.
Il project da la vischnanca da Seglias cumpiglia la via da Tumleastga entaifer il cunfin da la vischnanca da Seglias, davent da la punt sur l'Alvra fin a la plazza communala e la via champestra davent da la plazza dal vitg fin a la sortida dal vitg ost.
En la vischnanca da Tumleastga cumpiglia il project da sanaziun la via da la Tumleastga entaifer il cunfin da vischnanca Tumleastga, da Tumegl, da Mulegns (Tumleastga Nord) fin tar l'aclaun da Galgen (Pratval sid). L'engrondiment da la zona existenta tempo 30 a Roten per circa 220 meters vers nord e per circa 90 meters vers sid vegnan approvads da la regenza.
Il project da sanaziun da la vischnanca da Lantsch cumpiglia la via dal Güglia entaifer ils cunfins communals da Lantsch al nord fin a Vazerol al sid sco er la via da Brinzauls davent da l'access a la via dal Güglia fin a l'ur dal vitg. En la vischnanca da Masein cumpiglia il project per la via dadens e Mantogna il traject entaifer il cunfin communal da Masein davent dal Lochmühle (Masein nordost) fin tar la sortida sidvest dal vitg da Masagn.
Sustegn per guauds grischuns
Il Grischun investescha quest onn bun 30 milliuns francs per la tgira e l'economia dal guaud. La regenza grischuna ha approvà in project cun 5 programs regiunals ch'èn vegnids elavurads ensemen cun radund 200 possessuras e possessurs da guaud privats e publics. Quels duain survegnir 25 milliuns. Cun las mesiras duai tranter auter er vegnir tgirà il spazi da viver per ils animals che vivan en il guaud.
Elecziun
La regenza ha elegì Raphaela Holliger sco presidenta dal cussegl da scola dal center da furmaziun da sanadad ed affars socials. Ella è elegida per la perioda dals prim da fanadur 2024 enfin ils 30 da zercladur 2026. Holliger surpiglia il post da Claudio Lardi ch'ha stuì chalar pervi da la limita da temp d'uffizi.
Messadi davart la collavuraziun dal turissem cun l'uffizi da turissem
La Regenza ha prendì enconuschientscha d'in rapport da la Scola auta da Lucerna davart la collavuraziun tranter l'Uffizi chantunal d'economia e turissem ed ils partenaris da l'economia. Quels vesan positiv la collavuraziun.
Il rapport è vegnì instradà sin incumbensa dal Cussegl grond – la regenza infurmescha en il messadi il parlament davart ils resultats ed ils cussegls da la scola auta. Ils deputads e deputadas tractan la fatschenta en la sessiun d'avust 2024.
