Il clutger da Sent è vegni fabritgà il 1900 da l'enconuschent architect ed impressari Nicolaus Hartmann. Atgnamain aveva el previs da fabritgar quest clutger a San Murezzan, ma quels han refusà. Sent ha gì la pussaivladad da surprender quels plans.
12 meters pli auts che previs – per 17'000 francs dapli
Nicolaus Hartmann ha durant la fabrica avisà da fabritgar il clutger per radund 12 meters pli aut, quai per pudair duvrar tut la crappa e material restant. El aveva offrì da realisar il clutger per custs da planisaziun da 40’000 francs. Causa l’auzament ha el sez stuì sbursar ulteriurs 17’000 francs.
Il clutger en stil neogotic è in dals emprims objects fabritgads per part cun betun. Decennis e decennis ha quai funcziunà bain, ma ussa datti emprims problems. La ferramenta corrodescha e singuls elements da betun ston vegnir construids da nov. In dals problems è la colliaziun dal betun gross cun quel fin, vul dir cun quel da la surfatscha, uschia il restauratur Tobias Hotz da Weinfelden.
Blers clutgers han ina culla da metal sisum ed en quella chattins adina puspè relicts istorics. Uschè era a Sent, ma ils documents ed in cudesch èn en in stadi fitg nausch. Quels documents èn vegnids tramess a l'Uffizi archeologic dal chantun Grischun per empruvar da salvar quels.
La sanaziun vegn a custar radund 1,1 milliuns francs. Tenor Tobias Hotz preves’ins da finir las lavurs il mais october.
