Chatscha bassa - A chatscha da lieurs cun agid dal nas fin

Dapi 30 onns va il policist pensiunà Leo Duschèn mintg’onn a chatscha da lieurs mo pli ensemen cun in da ses chauns. Da vesair sco ch’il chaun lavura plain energia, sco ch’el arriva dad ir suenter in fastiz per uras, fin ch’el chatta il zop da la lieur til fascinescha fitg. La passiun per ils chauns da la razza «Luzerner Laufhund» è uschè gronda, ch’el è sez daventà allevatur da chauns.

Trenament intensiv

Per ch’in chaun da chatscha daventa propi bun dovri bler temp ed engaschament dal possessur. Durant tut l'onn vegn trenà il nas fin en ils guauds. Per la paja sa paja ora quest trenament lura durant la chatscha. Pertge sch’ina lieur è d’enturn, lura chatta il chaun per il solit il fastiz, ed el arriva da scurrentar ella.

Tut la lavur na fa il chaun lura tuttina betg. «Blers pensan ch’il chaun chatscha la lieur vers il chatschader. Quai nun è betg il cas. La lieur scappa nua ch’ella vul, il chaun curra simplamain suenter bublond», declera Leo Duschèn. Igl è tuttina da savair nua ch’igl è il meglier post cun la pli gronda probabilitad che la lieur curra lura era tras. Adina na funcziuna quai betg, e lura ha la lieur gudagnà. Ma igl è sco tar mintga chatscha – schluppettar nun è il pli impurtant. Essenzial è da pudair passentar in bel di d’atun en il guaud cun il meglier cumpogn.