Luigi Gmür è spanegià. Il chau da l'alp da Ischolas sur Ramosch vesa en quest mument, sche la lavur da las ultimas sis emnas ha rendì. Sche la producziun da chaschiel – da circa 1'000 magnuccas en la stagiun da stad da l’alp – è gartegià u betg sa mussà numnadamain suenter l'emprim tagl.
Differents facturs per la qualitad
In bun chaschiel d’alp pretenda blera lavur. Per l'ina ston las vatgas che vegnan dals purs esser bunas e saunas. Durant il mulscher na dastgan betg capitar sbagls. Per l'autra ston las circumstanzas dal schler – nua tge las magnuccas da chaschiel vegnan depositadas – esser bunas per il product.
1% da la producziun da chaschiel en Grischun è donnegiada
Sch'il chaschiel ha memia blers sbagls – per exempel da memia foras u ina crusta fallida – vegnan quellas magnuccas dismessas, declara Luigi Gmür. Sch'il chaschiel ha be paucs sbagls, vegnan quels elavurads sco Fondue u era en rodas da chaschiel.
Il prim tagl è fatg
Per quest eveniment important èn tut las persunas ch'han lavurà per producir il chaschiel sa radunadas. Pia tuts dals pasters, il signun, il cussegliader per la producziun da chaschiel Michael Schmid dal Plantahof ed er il chau d’alp. Suenter il tagl manegia il cussegliader, che la qualitad è buna. Era Luigi Gmür è cuntent. La lavur da ses team d’alp e grategiada.
Or da l'archiv:
Adina puspè ha RTR visità differents signuns e differentas chascherias dal Grischun per sclerir tge ch'è impurtant per producir in chaschiel da buna qualitad ed era dumondas sco per exempel: Co po chaschiel avair uschè differents gusts?
