L’hotel Chasa Chalavaina e ses ustier, Jon Fasser, èn enconuschents lung sur ils cunfins grischuns ora. La gronda part da ses osps na scheva betg ch’els van en l’hotel Chasa Chalavaina, mabain ch’els van tar «Jonni da la Chalavaina». Quai garantì era pervi ch’el ha manà l’hotel cun corp ed olma – e sin ina moda e maniera in zichel pli speziala. Uschia na pudevan ils osps per exempel betg tscherner ina tratga or d’ina carta da menu. I deva simplamain in menu e quel vegniva preschantà da l'ustier sez. Cun la vendita da la Chasa Chalavaina va Jon Fasser cun 81 onns en pensiun, suenter ch’el ha manà quella bundant in mez tschientaner.
Sche jau vegn proximamain a pe, lura na vegn jau betg sperasvi la Chasa Chalavaina, quai è per mai meglier uschia.
Gia ses geniturs manavan in hotel a Müstair, l’hotel Münsterhof. Là e Jon Fasser creschi si ensemen cun nov soras. Pli tard ha lura ina da sias soras surprendì quel hotel. Uschia han ils geniturs cumprà in auter, apunto la Chasa Chalavaina ch’els han suenter in pèr onns lura surscrit a lur unic figl. Pia, l’hotellaria n’era per Jon Fasser betg insatge ester. Dentant avant che surprender l’hotel era el tar la polizia a Zug. Quai saja stà in bel temp. Causa che ses geniturs han dentant giavischà ch’el surpiglia la Chasa Chalavaina, saja el turnà avant 51 onns.
Cun la fin da schaner va a fin quest'era e per Jon Fasser cumenza cun 81 onns la pensiun. Quel temp veglia el nizzegiar per viagiar tras la Svizra ed ir a visitar ils lieus danunder che ses giasts vegnivan.
