Las lavurs vi da las duas staziuns da la Viafier Retica a Bever ed a Puntraschigna han durà plirs onns. Ils 10 da zercladur 2023 vegnan ellas inauguradas uffizialmain. Tuttas duas staziuns èn daventadas pli amiaivlas per clientas e clients ed adattadas tenor ils basegns da persunas cun impediments. Era part dal project ha fatg la construcziun dal vial dubel tranter Bever e Samedan. En tut ha la Viafier Retica investì stgars 80 milliuns francs.
Las lavurs a Bever e las serps
Las lavurs vi da la staziun a Bever han cumenzà l'avrigl 2019. Igl è vegnì construì in nov perrun amez e dus sutpassadis cun stgalas e rampas. Sco tetg è vegnì duvrà il vegl tetg da perrun da San Murezzan, ch'ha ina valur istorica. Dapi l'october 2020 è il nov perrun en funcziun.
Il medem mument è era vegnì construì in segund binari tranter Samedan e Bever. Tras quai pon ils trens che van tras l'Alvra e quels che van tras l'Engiadina ir parallel, quai che stabiliseschia l'urari, sco la Viafier Retica scriva en sia communicaziun. Durant quellas lavurs da construcziun han las vipras cruschadas, che vivan lung il binari en ils mirs, stuì vegnir translocadas. Suenter la finiziun la primavaira 2020 han ellas pudì returnar en lur refugi creà da nov.
Cun Puntraschigna èn uss tut las staziuns da la Viafier automatisadas
Las lavurs vi da la staziun a Puntraschigna han cumenzà la primavaira 2020 ed èn stadas finidas l'onn passà. Ils binaris èn uss sin il pli nov stan tecnic. En pli è vegnì fabritgà en in uschenumnà separader da fasas, quel pussibilitescha da pudair midar da current cuntinuà sin current alternant. Il traject sur il Bernina vegn manà cun current cuntinuà, la gronda part da la rait da la Viafier retica cun current alternant. En pli è il perrun vegnì prolungà sin 185 meters ed igl ha dà dus novs binaris morts. Il tetg istoric dal perrun sin binari 1 è vegnì sanà ed adattà a la nova autezza dal perrun.
En pli vegn il nov indriz da regulaziun manà da la centrala a Landquart. Cun quai è era la davosa staziun da la Viafier retica vegnida automatisada. Cun resguardar las premissas da la UNESCO èn la fatschada da la staziun e l'ura vegnidas sanadas. En in proxim pass duai vegnir sviluppà l'areal da la staziun ensemen cun la vischnanca.
Las duas staziuns vegnan inauguradas ils 10 da zercladur 2023, l'emprim quella da Bever e suenter quella da Puntraschigna. En tuts dus lieus datti in act uffizial, mintgamai cun ils presidents communals, il directur da la Viafier retica Renato Fasciati ed il manader infrastructura da la VR, Christian Florin.
