Durant la mesadad dal 19avel tschientaner han ins chanalisà l’En, fatg mirs a dretga e sanestra per proteger ils vitgs d'inundaziuns. Durant ils ultims onns èn ins vidlonder a renaturar e realisar in biotop ecologic lung il flum.
Preschentar al public il nov spazi da viver
En connex cun questa renaturaziun prevesa il vitg da Bever ussa da realisar in center d’infurmaziun per scolaziuns e perscrutaziuns. Cun in center d’infurmaziun vul ins preschentar la ritgezza da las spezias. Dal project duess profitar il turissem, las scolas indigenas, ma era students e scienziads da scolas autas.
La finanziaziun è betg segirada
Il project vegn sustegnì da la Pro Natura, WWF ed era da l'Uffizi per la natira e l’ambient Grischun. Ils iniziants spereschan sin sustegn da differentas varts sco per exempel stadi e chantun, scolas autas, vitgs da l’Engiadina e ulteriurs interessents. La realisaziun e previsa ensemen cun la realisaziun da l’ultim etappa da la revitalisaziun dal flum, che dura anc ils proxims dus fin trais onns.
Cumparegliaziun dals maletgs
Il project en general
L’Engiadin’Ota ha renaturà enfin oz sin ina lunghezza da radund 19 kilometer. Era il vitg da Bever è vidlonder a renaturar, la segund ‘etappa dura anc enfin l’onn 2021, els prevesan custs totals da 10 milliuns francs.
Cun in center da cumpetenza e furmaziun vul ins finalmain preschentar l’istorgia dal flum, sia biodiversitad cun tut ils animals che vivan en regiuns al cunfin da l’aua.
Telesguard 17:40