L'anteriur CEO dad Engiadina San Murezzan Turissem Gerhard Walter ha purtà plant cunter il cussegl d'administraziun da ses anteriur patrun tar la dretgira regiunala Malögia. I va per pretensiuns or dal contract da lavur e violaziun da sia onur professiunala. Quai ha ditg Gerhard Walter ad RTR. El haja empruvà quasi in mez onn da chattar ina soluziun extragiudiziala, però senza success. Perquai sa haja el uss decidì d'inoltrar pass giuridics.
Il president dal cussegl administrativ dad Engiadina San Murezzan Turissem, Marcus Gschwend, n'ha betg prendì posiziun envers RTR. Quai ord il motiv ch'i sa tracta d'in cas current.
Il cussegl d'administraziun aveva renfatschà a Gerhard Walter tranter auter gestiun manglusa e surpassament da cumpetenzas. Il preventiv saja vegnì surtratg per passa in mez milliun francs. Gerhard Walter ha refusà las renfatschas.
