L'anteriur schef da pista da las cursas da White Turf a San Murezzan n'è betg responsabel per l'accident d'in chavaltgader professiunal il 2017. A questa conclusiun vegn la Dretgira regiunala Malögia, rapporta la Posta Ladina.
Tar l'accident ils 26 da favrer 2017 era il chaval a la testa da la cursa passà en naiv loma e crudà. Il jockey englais George Baker era sa blessà grevamain. Dus ulteriurs chavals eran medemamain crudads. Pervi da l'accident ha il jockey stuì terminar sia carriera, suenter passa 1'300 victorias. La procura publica aveva instradà ina inquisiziun penala encunter il schef da pista pervia da blessura corporala greva per negligientscha. Il jockey George Baker aveva era purtà plant e pretendì ina indemnisaziun.
Las tractativas davant dretgira èn gia stadas avant in onn. Punct central era la dumonda, sch'il schef da pista u auters responsabels avessan stuì vesair il problem en la pista. Entras in stgarp en il glatsch era aua culada en la naiv ed aveva lomià quella. En la sentenzia scritta da la Dretgira regiunala Malögia èsi cler che quai n'è betg il cas. Diversas persunas cun gronda experientscha hajan controllà la pista e betg vis in problem. Era plirs experts han davant dretgira confermà quai. Ils organisaturs dal White Turf han dentant tratg consequenzas e controlleschan dapi l'accident il glatsch cun ina drona ed in radar.
Per la dretgira dettia gronds ed insurmuntabels dubis sche l'inculpà saja la culpa. Perquai saja el nun-culpabel, tenor il princip «in dubio pro reo». Il jockey ha fatg recurs davant Dretgira chantunala, n'ha dentant betg paja la prestaziun da garanzia da 15'000 francs, uschia che la dretgira n'è betg entrada en chaussa. La decisiun da la Dretgira regiunala ha cunquai vigur legala.