L'onn 1983 è la claustra Son Jon vegnida messa sin la glista dals patrimonis culturalas mundials da l'UNESCO. Quella giada è la claustra stada en decadenza. La claustra Son Jon, ensemen cun la citad veglia da Berna ed il district claustral da San Galla èn stads ils emprims bains culturals svizzers ch’en vegnids sin la glista dal patrimonis mundials da l’UNESCO, quai l’onn 1983.
Quai è stà avant 40 onns. La fundaziun «Pro Kloster St. Johann in Müstair» ha organisà las festivitads per quest giubileum che cuzzan dals 27 fin ils 29 october. Exponents da la politica, cultura e da la religiun èn preschents.
Tenor la legenda è Carl il Grond, suenter sia curunaziun sco retg dals Langobards, vegnì sin il Pass da l'Umbrail en ina burasca ch'el ha survivì saun e salv. Sco engraziament haja el fundà la claustra Son Jon. Da quai dat testimonianza la statua da stuc en la baselgia. L'emprim era quai ina claustra per muntgs, dapi il 12avel tschientaner èsi dentant in convent per mungias. Durant si' istorgia da passa 1200 onns era la claustra adina abitada.
