Da principi èsi lubi en Svizra da campar selvadi: Pia da metter si la tenda insanua sin terrain public e pernottar. Scumandà èsi dentant per exempel en asils da selvaschina u er en territoris natirals protegids sco per exempel en il Parc Naziunal u en biotops. Quai tuna bain simpel, uss vegnan dentant anc ils chantuns e las vischnancas en il gieu, quels pon far lur atgnas reglas.
Campar selvadi n'è betg scumandà generalmain en Svizra, dentant er betg lubì dapertut.
Uschia èsi per exempel en il Grischun scumandà da pernottar sin terren public, quai dentant cun excepziuns. Sur il cunfin da guaud en ils culms èn singulas pernottaziuns lubidas. Las vischnancas pon dentant puspè far agens scumonds. Perquai èsi tenor l'experta da dretg da SRF Gabriela Baumgartner il pli simpel e segir da contactar la vischnanca u il biro da turissem da la regiun.
Quels san nua ch'igl è lubì da campar ordaifer las plazzas ufficialas.
Anc ina giada auter èsi en ils bass, per exempel tar ina tura da velo tras la Svizra. Sch'ins vul per exempel pernottar sin in prà u sper in guaud. Là decida numnadamain il possessur dal terrain, pia savens il pur sch'el laschà campar glieud sin ses terrain u na. Ed anc ina giada auter èsi tar vehichels sco busins. Er qua valan las reglas da vischnancas e chantuns, savens vegnia tenor Gabriela Baumgartner tolerà da pernottar ina notg sin in plaz u parcadi.
Tge che vala dentant adina è da laschar enavos il plaz da campar uschia sco ch'ins ha chattà el. Pia laschar enavos nagin rument u rests da mangiativas e prender resguard da flora e fauna.
S'infurmar per evitar chasti
Resumà pon ins pia dir: Las reglas pon esser da vischnanca a vischnanca e da chantun a chantun autras. Perquai renda quai da s'infurmar ordavant cun per exempel telefonar a la vischnanca u al biro da turissem per sclerir tge che vala. Per lura er pudair giudair la natira e la levada dal sulegl cun vista or da la tenda senza stuair temair in chasti. Er quel è – co pudessi esser auter – different da chantun tar chantun u vischnanca tar vischnanca. Tut tenor poi custar plirs millis francs.