La Grischelectra ha vendì l'onn da fatschenta 2022/2023 4% dapli electricitad che l'onn da fatschenta avant, numnadamain radund 441 milliuns uras kilowatt. Quai ha fatg a savair la societad da producziun da forza electrica en ina communicaziun. Cumpareglià cun la media dals 10 onns passads, ha la Grischelectra però producì 24% pli pauca electricitad. Las entradas per l'energia producida l'onn da fatschenta 2022/2023 muntan a stgars 41 milliuns francs.
Vischnancas da concessiun e chantun survegnan 0,5 milliuns dapli
Las vischnancas da concessiun da la Corporaziun Energia Engiadina, la vischnanca da Mesocco sco era il chantun Grischun survegnan bun 2,6 milliuns francs. Quai è in mez milliun dapli che l'onn avant.
Sco quai che la Grischelectra scriva plinavant, sajan ils custs da producziun entant s'augmentads l'onn da fatschenta 2022/2023 a 9,18 rp./kWh. L'onn avant eran ils custs da producziun anc tar 6,74 rp./kWh. Quest augment haja cunzunt dà perquai ch'ils custs da producziun d'ovras partenarias sajan creschids. Influenzà ils custs da producziun hajan tranter auter er ils auts pretschs da martgà.