Durant quatter sairas han ils responsabels dal secretariat dal Cussegl grond purschì quatter scolaziuns a Cuira. Durant quellas han ils novs e las novas emprais d’ir enturn cun ils documents electronics ed els han survegnì lur computer a tablet.
Il manader dal secretariat Patrick Barandun di: «Nus empruvain da simplifitgar l’entschatta». Il chantun fa scolaziuns per mussar co chattar e tractar ils documents electronics. Plinavant han las fracziuns la pussaivladad da sa laschar declerar ils instruments politics ch’i dat.
L’andament en il parlament ed ils process politics èn pli e pli cumplex, quai è ina sfida per ils novizs e las novizas.
-
Bild 1 von 3Legenda: Patrick Barandun durant la scolaziun per las novizas ed ils novizs. RTR -
Bild 2 von 3Legenda: Blers documents – dentant la gronda part digital. RTR
-
Bild 3 von 3Legenda: Ils documents per la scolaziun èn pronts RTR
Radund 50 politicras e politichers vegnan a prender plaz da nov en il Cussegl grond la fin d'avust ed han er fatg part a la scolaziun, organisada dal chantun. Persunas giuvnas sco la verd-liberala Geraldine Danuser (27) e persunas rutinadas sco Renatus Casutt (71) da la PPS.
Differenza tranter ils digital natives e la generaziun pli veglia
Per in digital native sco Geraldine Danuser n'è la scolaziun betg stada in grond striegn. L'annunzia sin ils portals dal Cussegl grond e las applicaziuns dals documents electronics n'èn stads nagin problem per la verd-liberala e suenter in'ura ha ella gia pudì bandunar la scolaziun.
Dapli temp ha la veglia vulp politica, Renatus Casutt duvrà avant che tut ha funcziunà sco giavischà. El è gia stà dal 2006-2014 en il parlament grischun. Da lez temp vegniva anc lavurà bler dapli cun palpiri – ozendi va tut electronic. Ma cura ch'ins s'occupia cun la materia, na saja quai era betg in grond problem.
Las novas fatschas vegnan a procurar per vent frestg en il parlament grischun a Cuira. E grazia als davos dis na duessi era betg dar incaps tecnics tar ils novs parlamentaris.
La nova legislatura dal Cussegl grond cumenza cun la sessiun d'avust che dura dals 31 d'avust fin ils 3 da settember.