In zic gnervus, però cun grond schlantsch èn ils dus novizs sa bittà vi da la lavur. Dumandads èn omadus numnadamain stads zunt svelt. Entant che Martin Bühler ha gì da sa fatschentar cun in'incumbensa per augmentar las deducziuns tar la taglia, è Carmelia Maissen vegnida confruntada cun il luf.
Per mai èsi schon anc terra nova, quai stoss jau dar tiers. Jau hai bain gia tadlà debattas ch'han pertutgà mai sco manader d'uffizi. Ma uss seser davant e represchentar fatschentas, quai è nov. Ma jau ma sent betg mal.
E qua èn las emprimas differenzas sa mussadas. Martin Bühler è restà curt e cumpact; gnanc trais minutas ha el duvrà per preschentar sia posiziun, e quai inclusiv far sgnoccas.
Per quai ch'igl è pir 6 emnas dapi ch'jau sun en uffizi, crai jeu ch'il start saja gartegià. Dentant sa chapescha datti anc massa dossiers ch'jau stoss anc ma leger en fitg profund.
Auter Carmelia Maissen; sia emprima incumbensa è numnadamain gist era stada dispitaivla – in'incumbensa, inoltrada da Gian Michael da l'Allianza dal Center, che pretenda numnadamain ch'il chantun elimineschia il triep dal Beverin – sin basa da la clausula generala da polizia. Adumbatten ha Carmelia Maissen admonì il Cussegl grond che la regenza n'haja nagina basa legala per in tal agir.
Deputadas e deputads èn cuntents cun la lavur
Las deputadas ed ils deputads èn entant per gronda part cuntents cun la premiera dals dus novizs. Ils pli blers han dà bunas notas ed èn da l'avis ch'els fan omadus ina buna emprima parita. Dentant cler, i saja anc fitg baud per gia dar notas e pudair valitar la lavur. Quai saja lura pussaivel suenter in mez onn u forsa er pir suenter in onn.
