L'Allianza dal Center grischuna propona d'eleger Franz Sepp Caluori sco nov vicepresident dal Cussegl grond. Cun Caluori, che presidiescha Gastro Grischun, vegnia puspè la branscha da gastronomia represchentada, scriva la partida. Cunquai daventa il gastronom da Cuira tenor usit l'onn 2023 president dal Cussegl grond.
- abita a Cuira
- annada 1959
- deputà en il Cussegl grond dal cirquit Cuira
- president da Gastro Grischun
- ospitant Cafe Confiserie Caluori
- commember dal cussegl da scola da la scola professiunala artisanala Cuira
Per il proxim onn dentant è Tarzisius Caviezel il pli aut Grischun. Il deputà da la Partida liberaldemocratica è actualmain vicepresident. Caviezel succeda cunquai ad Aita Zanetti ch'è stada fin uss la pli auta Grischuna.
- abita a Tavau
- annada 1954
- dapi 2020 president Uniun chantunala dals chatschaders da patenta
- dapi 2014 deputà en il Cussegl grond
- 2013 - 2020 landamma da la vischnanca da Tavau
- 2007 - 2011 cusseglier naziunal
Formalmain sto il Cussegl grond anc eleger omadus. Las elecziuns han lieu ils 31 d'avust - l'emprim di da la sessiun d'avust. Il presidi dal Cussegl grond mida mintg'onn da partida a partida.
