La deputada Aita Biert (PS) presidiescha da nov la Gruppa rumantscha dal Cussegl grond. La nova deputada dal circul Suot Tasna che abita a Cuira succeda a Lorenz Alig (PLD), che ha terminà sia carriera en il Cussegl grond. Il Sursilvan è vegnì onurà per ses merits sco president e vicepresident durant ils ultims otg onns. Nov vicepresident daventa Gian Michael (AdC) – il deputà da la Val Schons.
La Gruppa rumantscha dal Cussegl grond è s’inscuntrada il venderdi per sa constituir en vista a la nova legislatura. Bun 30 deputadas e deputads da tut las partidas fan part a questa gruppa ch'è vegnida fundada l'onn 2001, sin l'iniziativa da la Lia Rumantscha. L'idea è da s'inscuntrar regularmain, e da s’engaschar per dumondas da ed enturn la lingua rumantscha.
