La WEKO fa danovamain investigaziuns tar firmas da construcziun en connex cun cunvegnas davart ils pretschs. Suspectadas vegnan trais firmas en la regiun Moesa:
- Censi e Ferrari SA impresa costruzioni
- Savioni Attilio SA
- F.Ili Somaini SA
Vinavant èn er las firmas ch'èn colliadas en furma da concern cun las numnadas suspectadas. Ils nums ha la WEKO publitgà oz en il Fegl uffizial svizzer da commerzi (SHAB). I vala la presumziun d'innocenza.
Uniuns d'impressaris èn surpraisas
Duas da las trais firmas èn commembras da las uniuns d'impressaris chantunalas e federalas. Sco ch'il president da l'Uniun chantunala d'impressaris, Maurizio Pirola, ha ditg envers RTR, sajan ellas surpraisas da las investigaziuns da la WEKO.
Sch'ils suspects daventan pli concrets, vegnian ellas a sistir las commembranzas da las firmas
Avant in'emna e mez ha la WEKO communitgà ch'ella prendia sut la marella differentas interpresas da construcziun en la regiun Moesa pervi dal suspect da cunvegnas da pretschs. Ils indizis latiers derivan dal chantun. L'inquisiziun duai sclerir sch'igl ha propi dà cunvegnas che violeschan las reglas da cartel.
