Pertge dovra la Svizra ina cunvegna da forza electrica?
- per pudair stabilisar la rait da current en coordinaziun cun auters pajais da l’UE
- per pudair vender electricitad al intraday market da l’UE
Pertge ha era l’Uniun europeica interess d’ina tala cunvegna?
- lingias da current impurtantas passan atras la Svizra
- ovras idraulicas svizras servan sco battaria
I sa tractia d’ina dependenza viceversa, di Mario Cavigelli, president dals directurs chantunals d’energia. Entant ch’i saja fitg impurtant per la Svizra da pudair participar als gremis decisivs da l’UE per stabilisar sia rait, saja l’UE avisada sin las lingias da current atras la Svizra. Per exempel la lingia che va sur il Pass dal Bernina e furnescha l’electricitad che l’Italia importeschia dal nord da l’UE.
Bufatg optimissem
Perquai è Mario Cavigelli tuttina bufatgamain optimistic. El è persvadì che la Svizra cuntanschia a lunga vista ina cunvegna per forza electrica cun l’UE – era sche la cunvegna instituziunala na va betg en vigur. E forsa pudess ina tala cunvegna lura perfin servir sco model per era renovar autras cunvegnas bilateralas.
L’electricitad è uschè impurtanta, ch'ins na po betg sa lubir da betg reglar quest sectur
Piztgadas u furadas en il sectur d’energia?
Avant dus onns ha l’UE betg pli concedì l’equivalenza a la bursa a la Svizra, perquai ch’i na gieva betg vinavant cun la cunvegna bilaterala. Pudess l’UE uss forsa prender en mira il sectur da forza electrica? Quai na saja betg d’exclauder, di il cusseglier guvernativ ed ins sentia quai gia uss pass per pass.
Ord l'archiv:
Il temp suenter la guerra han ins scuvert l'aua – la cotgla alva – sco furnitura d'energia e cumenzà a bajegiar numerus mirs da serra. In Cuntrasts che datescha dal 1997 ha tematisà quel tema.
In Cuntrasts che datescha dal 1998 tematisescha la liberalisaziun dal martgà da forza electrica e las consequenzas per il chantun Grischun.