Ils davos mais hai dà bleras midadas tar il persunal dal teater da Cuira. Quai malgrà che la gronda midada cun la directura Maike Lex che surpiglia il timun l'avust stat avant porta. Il persunal aveva clamà per agid il cussegl da fundaziun, lura hai dà ina intermediaziun tranter las partidas. Sco Johannes Flury, il president dal cussegl da fundaziun, declera dettia plirs motivs per la malcuntentschientscha. Tranter auter haja dà conflicts pervia da la midada dal directur ed era pervia da las finanzas.
Il teater haja relaschà persunal pervia da lungs temps da malsognas. I haja dentant era dà disditgas pervia dals conflicts cun il directur partent e pervia da la nova directura. Auters hajan simplamain chattà ina nova plazza. Ils motivs per la fluctuaziun sajan tenor el fitg divers. Las quatter plazzas vacantas hajan ins pudì occupar, uschia ch'i na manchia betg persunal al teater. Ina sfida che restia sajan las finanzas. Ins n'haja per exempel betg pudì adattar las pajas pervia da l'inflaziun perquai che ils daners manchian. Il cussegl da fundaziun saja en contact cun la citad ed il chantun per chattar soluziuns. Cun las midadas da persunal e la nova directura che entra l'avust en uffizi è la speranza che la situaziun sa calmia puspè.