A Cuira èn duas scolaras vegnidas plidentadas la gievgia suentermezdi a moda immorala d'ina persuna estra ord in auto. Sco quai che la citad communitgescha hajan las duas mattas reagì a moda exemplarica e sajan en segirtad. Ellas sajan s'allontanadas immediat da l'auto da la persuna, idas a chasa ed hajan orientà ils geniturs. Lezs hajan lura orientà las scolas e la polizia.
La direcziun da scola haja orientà tuttas chasas da scola ed er communitgà reglas da cumportament. Ils geniturs survegnan prest in palpiri d'orientaziun e da cumportament en tals cas. La polizia intensivescha las controllas sin las vias da scola e marchescha dapli preschientscha, scriva la citad.
Co proteger l'agen uffant?
Avrir la boxSerrar la box
Tematisar il privel cun l'uffant.
Sch'in uffant vegn dumandà dad esters or da l'auto ubain er a pe insatge, lura dastga l'uffant ignorar quai u esser malamiaivel e per exempel far attent la persuna da dumandar ina persuna creschida.
En cas d'urgenza dastga l'uffant respunder dad aut «Na quai na vi jau betg» e clamar per agid.
Sco persuna creschida duess ins viver avant als uffants, ch'ins tegna distanza, sch'ins vegn dumandà insatge da persunas ch'ins n'enconuscha betg.
Sche pussaivel duessan uffants chaminar da chasa en scola ed enavos en gruppas e betg in uffant sulet.
Ir cun l'uffant la via da scola e guardar, en tge lieus che l'uffant pudess ir en segirezza – per exempel en ina butia.
Sco genitur adina avair ina ureglia averta per quai che l'uffant raquinta.
