A partir da quest glindesdi datti mintga di differentas activitads en il liber. E schon tar l’emprim curs è l’interess grond. Indesch dunnas fan la damaun ensemen sport sin il Kornplatz a Cuira. Musica da motivaziun resuna dal autpledader: in maletg ch’ins n’ha ha uschia betg anc vesì. A la testa da la gruppa è l’instructura Alice Schmid che dat normalmain ils curs en «Fitnesstower» a Cuira. Plain energia e cun grond gust suondan las dunnas als exercizis che l’instructura mussa avant.
In sentiment ch’ha muncà
Surveglià vegn il curs da Peter Bänziger, il manader da la partiziun sport da Cuira. Il cussegl da citad haja dà a ses team l’incumbensa d’organisar tals eveniment l’entir matg ora. Gia ussa sajan 700 persunas s’annunziadas per ils curs. Ins vesia ch’il interess da far sport è gist ussa gronds. Blera glieud na veglia betg pli restar a chasa.
Durant la pandemia è ils musculs vegnids fraids. I vala puspè d’activar els.
Il regl da sa mover gist creschì en la pandemia – quai cunzunt per las activitads da gruppa ch’èn enfin ussa betg stads pussaivels. Tar tut las activitads vala in maximum da 15 participants, uschia ch’ins po avair avunda distanza e pussibilitar da far il sport senza la mascra da protecziun.