La situaziun finanziala da las uniuns da sport a Cuira duain vegnir analisadas fin proxima stad (zercladur 2024). Quai per guardar, co ins po gidar il meglier quellas che han problems finanzials. Quai ha il parlament da la citad decis la gievgia.
Las fracziuns da l'Allianza dal Center, dals Liberaldemocrats e dals Verdliberals avevan inoltrà in incumbensa a la suprastanza da la citad cun il giavisch da sustegnair las uniuns da sport da Cuira che han problems finanzials. Concret vuleva l’incumbensa in augment da las contribuziuns da promoziun, ina reducziun da tschains tar l’infrastructura ed in'administraziun pli simpla tar la reservaziun da localitads da sport. Questa incumbensa è dentant vegnida refusada en favur da la proposta da la suprastanza, che vuless l'emprim analisar la situaziun fin proxima stad, avant che gia decider mesiras concretas.
Problems finanzials tar enqual uniun a Cuira
Il moviment ed il sport è impurtant, scriva la citad da Cuira en il concept da politica dal sport da la citad. Quai suttascriva era Andrin Ehrler, president da la ICS, la cuminanza d’interess da las uniuns sportivas da Cuira. La ICS è tranter auter responsabla per repartir las contribuziuns finanzialas da la citad, che van a favur da la promoziun da sport giuventetgna. Quels raps na tanschian dentant betg pli.
I dat fitg bleras uniuns (sportivas) a Cuira che han gia stuì dumandar per prolungaziuns u suspensiun da pajament
Per l’ina haja Corona gì in’influenza sin las chaschas da las uniuns e per l’autra saja oz simplamain pli grev da chattar voluntarias e voluntaris che s’engaschan tar las uniuns. Fertant che las contribuziuns da promoziun sajan bain creschidas dapi il 2015 levamain, notabene parallel a l’augment dal dumber da giuventetgna sportiva, èn ils custs da l’infrastructura da la citad creschids fermamain. Fin a 90% pli chars sajan ils tschains da locaziun dals implants sportivs vegnids. Il motiv è la nova infrastructura pli chara sin l’areal da la Obere Au: ina halla da glatsch e plazzas da ballape da pastget artifizial.
La halla da gimnastica custava 100.- CHF per ina stagiun d’enviern, il pastget artifizial custa 12.- CHF l’ura.
Sper in augment da las contribuziuns da promoziun pretenda in’incumbensa era ina reducziun da tschains tar l’infrastructura ed ina administraziun pli simpla. Cunzunt en la Obere Au chaschunia quella numnadamain blera lavur per las uniuns che han gia uss sfidas cun chattar persunal.
Nus stuain adina reservar la halla da glatsch da trenament e supplementarmain er anc las gardarobas. Sche nus na faschain betg quai èn las gardarobas serradas.