L'Uffizi da construcziun bassa renovescha la cuvrida da la cruschada Sommerau a Cuira sin ina surfatscha da 9'600 meters quadrat. Quai ha communitgà la regenza. Las lavurs da construcziun duran dals 16 da zercladur fin previsiblamain ils 26 da fanadur e vegnian fatgas mo la notg tranter las 20:00 fin las 05:00. Durant quest temp vegn il traffic reglà tras il persunal dal servetsch da traffic e – sche necessari – svià. Durant il di na datti naginas restricziuns per las persunas che fan diever da la cruschada; sco usità vegn il traffic reglà cun las amplas da traffic.
I sa tractia da l'emprima sanaziun pli gronda dapi che la cruschada è vegnida surdada al traffic avant radund 40 onns. Ils custs totals muntian a radund dus milliuns francs. Di per di circuleschan passa 23 000 vehichels sur la cruschada Sommerau.