Cudesch «Cumià da la mamma» - «Jau n'hai mai cridà dal cumià da mia mamma»

Uss èsi Gian-Marco Schmid sco autur. Pli baud eri Gimma sco rappunz. El ha scrit ses quart cudesch. En quest vai per sia mamma e per sia uffanza. En frasas curtas e blers chavazzins raquinta el da pli baud, ina uffanza marcada da la dependenza d’alcohol da sia mamma, da manzegnas ed era negligientscha. Tras numerusas singulas situaziuns vegn ins a savair, sco che la situaziun è stada tar Gian-Marco Schmid a chasa. Per exempel saja sia mamma adina ida alcoholisada cun auto. Ina autra situaziun ch'ha traumatisà el è la suandanta: La mamma haja mess a letg el e lura declarà, quants raps ch’ins survegia en auters pajais per in uffant. La mamma haja laschà sentir Gian-Marco Schmid ed era la sora, ch’ella na leva en sasez mai els sco uffants.

Els èn creschids si cun la mamma ed al cumenzament era cun lur bab a Domat. Pli baud ha Gian-Marco Schmid, ch’è enconuschent sco Gimma, fatg allusiuns a sia uffanza en sias chanzuns da rap ch’el ha scrit. Actualmain va el en terapia per elavurar tut. Gia pli baud ha el era fatg diever da sustegn professiunal – er el sez è stà dependent. Sco giuven en scola ha el fatg bunas notas e pervia da quai n'hajan scolasts u scolastas betg realisà tge che va tort a chasa tar Gian-Marco Schmid. El di che sulet vi da la vestgadira avessi ins pudì vesair la negligientscha. Per lung temp n'ha el sez era betg realisà che quai n'è betg normal. Sch’el pensa enavos sajan els e ses conscolars schon pli gugent stads tar auters a chasa – ma Gian-Marco Schmid ha pensà che davos las portas guarda quai tar autras famiglias ora tuttina. Pli tard ha el alura tschertgà motivs per il cumportament da sia mamma. Sia conclusiun è, che la dependenza d’alcohol e drogas era il pli grond problem. En pli na haja la mamma tenor el mai vulì esser mamma.

Gian-Marco Schmid ha cumenzà a scriver il cudesch avant in onn – il di cura che sia mamma è morta. Quest mument n'han els betg pli gì contact per 10 onns. En il cudesch ha el scrit tut quai ch’el n'avess mai ditg a sia mamma persunalmain. Il cudesch fiss daventà trais giadas pli lung. Però las lectoras han stritgà bleras parts. En il cudesch survegn la mamma da Gian-Marco Schmid dentant era intgins puschels da fluras. Per exempel n'avess el mai survegnì la plazza d’emprendissadi tar la bieraria senza ils contacts da sia mamma. Ed i dat era intgins muments e frasas nua ch’ins po rir. Il cudesch ha Gian-Marco Schmid era scrit perquai che bleras persunas na savevan betg da sia situaziun, pertge ch'igl è capità davos portas serradas.