La Regenza grischuna approva il project «Protecziun cunter crudadas da crappa Tuma Padrusa» da la vischnanca da Domat. Ella deliberescha ina contribuziun chantunala da maximalmain 105’000 francs per quest intent, scriva il chantun.
Pertutgada è la spunda sid da la collina «Tuma Padrusa». Questa collina da var 40 meters autezza è situada amez il territori abità. La spunda sid cuntegna gondas e survart grippa localmain fitg lucca. Gia pliras giadas èn crappas crudadas da là ed arrivadas sur la Via Carpera fin datiers dals edifizis situads al sid. In rempar ch'era vegnì construì ils onns 1980, protegiva fin ussa la Via Carpera ed ils edifizis d'abitar cunter crudadas da crappa e da blocca. En il fratemp è il rempar emplenì e per part donnegià, uschia ch'el na fa betg pli grond effect.
En il rom dal project duai il rempar existent vegnir disfatg ed al medem lieu duai vegnir construì in nov rempar cun dimensiuns adattadas. Ins quinta cun custs da 130'000 francs.