La regenza grischuna ha approvà ina contribuziun da var 5,2 milliuns francs per in pachet da projects per conservar ovras da protecziun. I va per projects da differentas vischnancas, da la Viafier retica e da l’Uffizi da construcziun bassa dal Grischun.
La finamira dal pachet da projects è da conservar ovras da protecziun cunter privels da natira. En il rom dal pachet da projects vegnan reparads 25 objects en tut il Grischun entaifer 2 onns. En tut duai il project custar 6,9 milliuns francs.
