Tge che ha cumenzà a Roma, senta ussa er Cuira. La separaziun da la «garda veglia» ha lieu. Cun l’elecziun da Bonnemain mussa Roma fitg cler, tgi che decida e nua ch’il viadi va. Ch’il papa ha tuttina tschernì ina persuna da la terna – la quala il chapitel catedral aveva refusà anc avant pauc temp – è ina gronda schleppa per ils circuls conservativs che cumbattan mintga midada e mintga transfurmaziun entaifer la Baselgia.
Il segn è evident: il nov uvestg sto surmuntar las tensiuns, las spartiziuns e las polarisaziuns en l'uvestgieu da Cuira. El sto construir punts enstagl da demolir talas, reunir carstgauns ed opiniuns enstagl da separar anc pli fitg ellas. Premissa è ch’el ha persunas en ses conturn che gidan e sustegnan el da realisar quel resvegl. Be uschia gartegi da reconstruir in clima da fidanza tranter la Curt e la populaziun.
Il pli impurtant è dentant ch’il nov uvestg taidlia puspè cun attenziun. Bler squitsch per Bonnemain. I fa dentant prescha: uschiglio scappan er las davosas nursas.
Flavio Bundi
schefredactur RTR
