Votaziuns communalas
En numerusas vischnancas decida la populaziun dal Grischun davart differentas fatschentas. Insaquants exempels: En il Partenz han anc 5 vischnancas da decider, sch'ellas vulan sa participar a la fasa da preparaziun dal parc da natira Reticon. En 5 vischnancas n'ha il parc enfin ussa survegnì nagin sustegn. A San Murezzan duain persunas da l’UE/EFTA, che stattan dapi almain 5 onns en Svizra, u persunas da terzs stadis che stattan dapi 10 onns en Svizra, survegnir il dretg da vuschar. Il suveran decida davart la revisiun da la constituziun communala. A Zezras decida il suveran davart in credit da 4,8 milliuns francs. Cun quels daners vul la vischnanca cumprar parts dal chastè en il center dal vitg sco era il parc latiers.
Iniziativa per scumandar da cuvrir la fatscha
Tgi che sa mova en il spazi public duai mussar sia fatscha. Quai è la pretensiun centrala da l’iniziativa. Lantschà l’iniziativa ha l’uschenumnà Comité da Egerkingen. Quella gruppa che vala sco gruppaziun dretga ha er gia lantschà l’iniziativa cunter minarets novs dal 2009.
Lescha davart l’identificaziun electronica
Ina e-ID è da principi il medem sco ina carta d'identitad – simplamain en varianta electronica. La lescha davart l'identificaziun electronica duai crear la basa legala per ina carta d'identitad electronica renconuschida da la Confederaziun. Crititgà vegn in pussaivel maldiever da datas.
Cunvegna economica tranter ils stadis da l’EFTA e l’Indonesia
L'Indonesia saja in partenari da commerzi empermettent, manegia il Cussegl federal ed il parlament. Perquai vulan els promover l'import e l'export. Critica datti dentant surtut pervia da l'ieli da palmas.
cuntegn
Votaziuns Il suveran decida questa dumengia
Parter
RTR novitads 12:00++ ; RTR Newsdesk
Parter