Per tge vai - Abolir las contribuziuns da maternitad

La lescha datescha da l’onn 1992 e vuleva sustegnair mammas, per ch’ellas na stoppian betg immediat puspè lavurar suenter la naschientscha da l’uffant ed era per evitar ch’ellas interrumpian la gravidanza per motivs finanzials. Malgrà il num «maternitad» na survegnan betg mo dunnas talas contribuziuns, mabain era umens. Las cundiziuns per survegnir daners èn tranter auter:

• la persuna che tgira l’uffant viva cun l’uffant en il medem tegnairchasa
• las entradas na cuvran betg ils basegns per viver
• la persuna che tgira l’uffant na lavura betg dapli che 50%

Ils ultims 10 onns ha il chantun pajà en media 800'000 francs ad onn per contribuziuns da maternitad.

Tgi che n'è betg cuntent cun midadas da lescha dal Cussegl grond po far in «referendum facultativ», che basegna 1'500 suttascripziuns da votantas e votants ubain in dieschavel da las vischnancas grischunas.

Votaziuns da referendum na datti dentant betg uschè savens en il Grischun. L'ultima giada è quai stà l'onn 2014, lura persuenter gist en duas votaziuns:

Cunter la refurma dal territori hai dà in referendum cun 1'874 suttascripziuns resp. 18 vischnancas. E cunter la gulivaziun da finanzas èn s'opponidas 1'998 persunas e 19 vischnancas. Omadus referendums han dentant fatg naufragi a l'urna e votantas e votants èn suandads la proposta da regenza e parlament.