Legenda: Mustér RTRMustér
Mustér di Gea ad in credit dad 8,7 milliuns francs per l'emprima etappa dal center da sport e cultura, Center Fontauna. Il center actual è vegnì en ils onns e duai perquai vegnir engrondì, amplifitgà e modernisà. L'emprima etappa prevesa custs da 10,6 milliuns francs. La vischnanca surpiglia suenter questa decisiun dal pievel 8,7 milliuns francs. Per la segunda etappa vegn quintà cun bun 3,5 milliuns francs.
Legenda: Scuol RTRScuol
Il suveran da Scuol ha ditg duas giadas Na: Ina giada cun 51,1% a la lescha da parcar. Quella lescha avess vulì ch’ins avess pudì parcar pli lunsch davent dals centers pli ditg ed er pli favuraivel. La lescha fiss stada necessaria, cunquai che las duas fracziuns Ftan e Tarasp n’han anc nagina tala lescha. –– Lura ha il suveran da Scuol era ditg Na la lescha da taxas da construcziun – quai cun 66,8%. Er quella votaziun era necessaria, perquai che be Scuol ha enfin uss ina tala lescha e las autras fracziuns betg. –– La la vischnanca ha cun 62,2% ditg Gea a l'adattaziun da sia lescha da taglia. La votaziun è stada necessaria per avair ina lescha ch'è confurma a la lescha chantunala.
Legenda: Zernez RTRZernez
Ils votants e las votantas da Zernez èn suandads a la proposta da la suprastanza d’abolir l’obligaziun da stuair eleger commembras e commembers dal cussegl communal e dal cussegl da scola ord mintga fracziun. Ina maioritad da 75% ha approvà questa midada. Cunquai ch’i sa tracta da midadas en la constituziun e leschas hai duvrà ina votaziun a l’urna. –– Plinavant han ils da Zernez er approvà la revisiun parziala da la lescha d’impostas e da la lescha da pumpiers.
Legenda: Claustra-Serneus RTRClaustra-Serneus
La vischnanca Claustra-Serneus ha en futur be pli num Claustra. Avant quatter onns aveva in cusseglier communal inoltrà ina moziun per midar il num. La raschun era d'avair in num pli simpel ed esser pli gist envers las autras fracziuns – en spezial cun Saas ch'ha pir pli tard fusiunà cun Claustra, ma è pli grond che Serneus.
Legenda: Schiers RTRSchiers
Ils da Schiers han decidì da cumprar enavos la parcella «unterem Bahnhof» per 1,8 milliuns francs. I va per terren industrial che la vischnanca aveva vendì avant tschintg onns ad ina cuminanza d'interess per realisar in parc da mastergn. Damai ch'i n'è enfin oz betg vegnì bajegià, ha la vischnanca uss il dretg da cumprar enavos la parcella. Ina cuntraproposta vuleva dar dapli temp a la cuminanza d'interess per tuttina anc persvader investurs. La proposta da la suprastanza communala da cumprar enavos la parcella ha dentant survegnì dapli sustegn da la populaziun.
Legenda: Tavau RTRTavau
75% dals da Tavau han ditg Gea ad in'iniziativa che restrenscha fieus artifizials en vischnanca. Fieus artifizials pitschens cun sbrinzla, vulcans etc. restan en futur anc lubids. Fieus artifizials gronds datti dentant be tar occurrenzas da muntada surregiunala e cun lubientscha da la suprastanza communala. –– Ils da Tavau han però ditg Na a l'iniziativa per dapli abitaziuns pajablas en vischnanca – quai cun 54% da las vuschs. En almain in lieu central avess la vischnanca tenor l'iniziativa stuì porscher abitaziuns cun tschains da locuziun che sa basan be sin ils custs effectivs.
Legenda: Glion RTRGlion
Il suveran da Glion ha approvà cun ina maioritad da 75,6% la revisiun parziala da la planisaziun locala Crappa Grossa. La raschun per la revisiun parziala è, che la GRegio Energie SA vul realisar in'ovra electrica da biomassa, inclusiv ovra da pelletar ed implant da setgentar. Per quest intent sto ina parcella da la zona da guaud vegnir midada en ina da commerzi. L’ovra fiss la segund gronda da quest gener en il Grischun.
Legenda: Roveredo rtrRoveredo
Il suveran da Roveredo ha ha concedì cun 82% in credit dad 8,75 milliuns francsper restabilir la via forestala da Roveredo a Monti di Laura sin la spunda sanestra da la Val Mesolcina. La via ha ina lunghezza da 10,5 kilometers e maina sur territori da la vischnanca Roveredo e da San Vittore. L’ultima giada è la via vegnida asfaltada ils onns 1960. – Ultra da quai ha il suveran er approvà cun ina maioritad da 73% novas prescripziuns per il traffic motorisà sin vias forestalas.
Legenda: Breil RTRBreil
La via da colliaziun tranter Vuorz e Breil è in pass vinavant. Il suveran da la vischnanca fusiunada Breil ha approvà cun ina maioritad dad 87% la revisiun dal plan general d'avertura. La via da colliaziun è stipulada en il contract da fusiun e cunter quella hai adina puspè dà opposiziun.
Legenda: Val RTRVal
Il suveran da Val ha approva dad extender la zona d'explotaziun da crappa «Schmitteli» e quai cun ina maioritad dad 84% da las vuschs. La raschun per quest pass è ch'igl ha dà in nov concept per pudair explotar la crappa. Quel resguarda la segirezza dal persunal e da la via chantunala.
Legenda: Flem RTRFlem
92% dals votants e las votantas da Flem han approvà la revisiun dal plan da zonas. I va per la chasa da tgira e dimora Plaids a Flem che duai vegnir engrondida cun 15 ulteriuras abitaziuns per persunas pli passadas. Per far quai dovri ina midada en il plan da zonas. Ina gronda part da l’areal sin il qual la surbajegiada sa chatta sto vegnir messa en la zona per edifizis publics. Per la vischnanca na datti nagins custs, cunquai che la fundaziun da la chasa da dimora e tgira Plaids surpiglia tut ils custs. –– Ed 80,3% dals da Flem han ditg Gea a la cumpra da la parcella cun il bajetg da la posta Flem/Waldhaus per 2,36 milliuns francs. La finamira è da rinforzar uschia il potenzial turistic dal lieu e prevegnir ad ina surbajegiada massiva. – La participaziun a las votaziuns è cun 79,3% stada fitg auta a Flem.
Legenda: Arosa RTRArosa
Ils votants e las votantas dad Arosa han ditg cun 50,5% Gea a la lescha per ina taxa d'alloschament ed ina taxa per promover il turissem. Quellas duain vegnir unifitgadas per l'entira vischnanca. L'onn 2015 aveva il suveran anc refusà ina revisiun da la lescha per il turissem.
Legenda: Trimmis RTRTrimmis
Votantas e votants da Trimmis han approvà dus credits da bunamain 4 milliuns francs: Cun 84,5% è vegnì acceptà il credit da 2,5 milliuns francs ch`è previs per remplazzar il stgaudament da zinslas e per eventualmain schlargiar la rait da chalur a distanza. E cun 68,7% è er il segund credit da radund 1,4 milliuns francs approvà. La vischnanca vul cun quels daners realisar in areal da parcadis per lung da la via Montalin tar l’areal da scola.
Elecziuns
En las vischnancas grischunas n'èsi betg mo stà da votar, mabain savens era d'eleger las autoritads communalas. Qua ina survista:
