La proposta da la PS ha malgrà simpaticas da tuttas varts giu nagina schanza. Bain na dastgian mulestas en il rom dal Cussegl grond e sias sessiuns betg vegnir toleradas, uschia il tenor da las deputadas e deputads, la via sur l'urden da fatschenta saja però la fallida.
Reglas naziunalas na tanschan betg, instituziuns ed organisaziuns dovran atgnas mesiras
La PS percunter era da l'avis, sch'i dat gia in reglament pertutgant la vestgadira, dastgia era dar in passus pertutgant il cumportament dals politichers e las politicras. Politica da simbol, senza effect, hai giu num da las autras partidas.
La protecziun envers mulestas è da gronda impurtanza – politica da simbol na porta però nagut
A la fin ha il Cussegl grond refusà la proposta dals Socialdemocrats cun 88 tar 28 vuschs. Nagina trumpada, ha ditg Beatrice Baselgia, ch'ha inoltrà la proposta. Ella haja spetgà cun quest resultat; ch'il tema vegnia valità da bleras sco impurtant fetschia però speranza, ch'ins chattia autras vias sco proteger el futur deputadas e deputads dad eventualas mulestas.