L'emprim dals sis umens è vegnì malsaun trais dis suenter ses return da l'ester. El è ì tar il medi per laschar testar sin il virus. Dapi lura è il team da contact-tracing dal chantun vid elavurar las chadainas d'infecziun ed infurmar las persunas pertutgadas. Ils sis umens èn en isolaziun.
Tuttas persunas ch'èn vegnidas en contact cun ils umens suenter ch'els èn turnads da l'exteriur, èn vegnidas en quarantina. En Grischun èn fin uss total 80 persunas en quarantina, las bleras pervi dal cas da Belgrad.
Las partys èn il problem
Ils sis umens sajan ids la fin d'emna avant in'emna en l'exteriur, sajan s'infectads e lura turnads en Svizra, ha declerà la media chantunala Marina Jamnicki oz a bun'ura a RSI. La raschun per las infecziuns saja la vita da partys sco tala.
I na gioghia nagina rolla nua che las festas hajan lieu. Sch'ina persuna saja malsauna, lura dettia simplamain il privel da s'infectar. Jamnicki appellescha a l'atgna responsabladad: Da far festa l'entira notg spatla dasper spatla, quai na giaja simplamain betg.
Tenor la media chantunala dettia uss basegn d'agir en il Grischun. Las structuras da manar che sajan vegnidas installadas la primavaira pervi da corona, sajan uss puspè vegnidas reactivadas.
Citad da Cuira è er alarmada pervi da Welschdörfli
Sco er en autras citads svizras haja er dà a Cuira accumulaziuns da persunas, uschia surtut en il Welschdörfli. Sco i para, na vegnia la distanza minimala betg resguardada. Quai dentant surtut sin funs public. Ils locals sa tegnian bain vid las mesiras. Per pudair evitar ch'i dettia puspè dapli infecziuns cun il coronavirus, vul la citad uss reagir cun mesiras:
- Tgi che ha in manaschi ordadora, po prolungar il temp d'avertura fin a l'ina empè da mesanotg. Uschia duai la circulaziun da persunas en la citad vegnir evitada.
- Sch'i dettia en il Welschdörfli fullas da persunas, duai l'access vegnir limità.
- Sin basa voluntara vegnian repartidas mascras da protecziun che la citad metta a disposiziun a moda gratuita.
- La campagna d'infurmaziun da la citad, «jau protegel tai e mai», duai vegnir chatschada pli ferm en il Welschdörfli cun agid da placats. Qua duai er l'impurtanza per l'economia vegnir suttastritgada.
- Plinavant vegnia il persunal dals locals, sco era il persunal da segirezza anc ina giada instruì e sensibilisà.
Infecziuns suenter visita en bar en Argovia
Er giu la Bassa hai dà pliras infecziuns en ina bar, quai a Spreitenbach en l'Argovia. Là èn passa 20 persunas s'infectadas cun il virus. Tenor la media chantunala hajan emprims scleriments mussà che las infecziuns stettian en connex cun las infecziuns en in club a Turitg d'avant bundant in'emna.
Il possessur haja serrà la bar fin almain la fin da l'emna. Quai ha il Departament da sanadad dal chantun Argovia communitgà. Il concept da protecziun da la bar vegnia uss examinà.