«Betg periclitar il guaud, la selvaschina e la chatscha»: Cun quai slogan han ils adversaris da l'iniziativa lantschà lur cumbat da votaziun. Tar ils adversaris tutgan tant commembers da l'Uniun chantunala da purs, l’Uniun da chatschaders e chatschadras da patenta, persunas ord la Federaziun forestala dal Grischun Selva sco er politicras e politichers da dretga fin sanestra.
Ils arguments principals
Tenor il comité saja l'iniziativa privlusa. Ella pericliteschia la chatscha grischuna sco ch'ins enconuschia ella per il mument. La chatscha grischuna resguardia oz gia autas pretaisas ecologicas, biologicas e da la protecziun d'animals. Vinavant scumandass l'iniziativa dad ir a chatscha suenter ils 31 d'october. Quai muntass dapli lavur per ils guardiaselvaschina che stuessian regular pli fitg ils animals.
In auter punct che disturba ils adversaris è la pretensiun ch'uffants sut 12 onns na dastgassan betg pli esser da la partida durant la chatscha. Qua stoppian ils geniturs sez decider per lur uffants.
Grond sustegn politic
Sustegn per ils adversaris datti er politicamain. Tant la Regenza Grischuna sco er il Cussegl grond recumondan da dir Na a l'iniziativa.
Ils aderents da l'iniziativa han avant bunamain duas emnas lantschà lur campagna – quai cun il slogan «Revoluziunar la chatscha».
«L'odissea» da l'iniziativa
Gia il 2016 ha il parlament chantunal tractà l'iniziativa. En trais puncts ha el dentant declerà l'iniziativa sco nunvalaivla. Ils iniziants han suenter fatg dus recurs: In emprim recurs tar la Dretgira administrativa chantunala. Pli tard hai anc dà anc in segund recurs tar il Tribunal federal a Losanna. Quel ha declerà tut l'iniziativa sco valaivla.
Sin in clic tut las fatschentas federalas, chantunalas e communalas: rtr.ch/votaziuns