«Revoluziunar la chatscha». Cun quest slogan ha il comité d'iniziativa lantschà ses cumbat da votaziun.
Ils arguments principals
Tenor ils iniziants stoppian ins proteger vatgas-tschierv e chauras-chavriel che portan e che han pitschens. Quai saja in fraud a la natira, sche animals pitschens perdan uschia lur mamma.
Plinavant vul l'iniziativa scumandar la chatscha a partir dal prim da november. Ils animals dovrian tut lur energia per l'enviern. Tar l'Uffizi chantunal da chatscha e pestga sco er en la cumissiun da chatscha stoppian er protecturs d'animals esser represchentads. Uschia na duai la protecziun d'animals betg vegnir a la curta.
Parlament e regenza chantunala han dentant schon recumandà da dir Na a l'iniziativa.
Er ils adversaris han lantschà lur campagna da votaziun. Tenor els periclitescha l'iniziativa tranter auter la chatscha grischuna, la selvaschina ed il guaud.
Desister da «maletgs sanguinus»
Sin ils placats da la campagna da votaziun dal comite d'iniziativa na chattan ins nagins animals: ni «animals gnocs», ni animals morts. Il comité veglia metter sin messagis clers.
«L'odissea» da l'iniziativa
Schon il 2016 ha il parlament chantunal tractà l'iniziativa. En trais puncts ha el dentant declerà l'iniziativa per nunvalaivla. Ils iniziants han suenter fatg dus recurs: In emprim recurs tar la Dretgira administrativa chantunala. Pli tard hai anc dà anc in segund recurs tar il Tribunal federal a Losanna. Quel ha declerà tut l'iniziativa per valaivla.
Sin in clic tut las fatschentas federalas, chantunalas e communalas: rtr.ch/votaziuns