Cun bun 2,5 milliuns pernottaziuns è il dumber sa reducì per 6,6%, cumpareglià cun la stagiun d'enviern dal 2014/15. Cumpareglià cun la media dals ultims 5 onns munta il minus schizunt a 9,6%. Cunzunt giasts dals pajais vischinants ha l'hotellaria grischuna pers ils davos onns.
25% damain l’avrigl
Guardà sin las cifras da l'avrigl passà vesa la situaziun da l'hotellaria anc ina giada ora pli nauscha. Cun 134’031 èn las pernottaziuns sa reducidas per in quart cumpareglià cun l’onn avant. Las grondas perditas nodan regiuns turisticas impurtantas sco l’Engiadin’Ota Bregaglia, Mustér Sedrun e Savognin Bivio Albula.
Svizra ha patì il december e schaner
En l'entira Svizra ha l'hotellaria stuì nudar in minus da 1,8% per la stagiun d'enviern 2015/2016, quai tar 15,4 milliuns pernottaziuns totalmain. Gronds minus da var 6% hai dà il december ed il schaner pervi da la mancanza da naiv. Percunter han ils mais mars ed avrigl purtà in plus da bunamain 2%.
RR Novitads 10:00