I n’è betg insatge nov che la gronda part dals purs grischuns na vul betg il luf. Els teman per lur scossas. Il chantun ha empermess sustegn, dentant ils purs n’èn betg dal tut cuntents. Els vulan dapli sustegn.
Il chantun mussa encletga per ils purs. Tenor quel dependi dentant era dals purs sezs, quant ditg ch’i va enfin ch’ins chatta ina soluziun. Ils purs duessan prender mesiras da prevenziun avant ch’i detta donns pervi dals lufs. Al Plantahof a Landquart porscha il chantun perquai cussegl per tut ils purs ch’èn interessads.
Collavuraziun per ina soluziun
Era sch’ils purs ed il chantun n’èn per il mument betg tant cuntents cun la situaziun, vulan omadus chattar ina soluziun che cuntenta a tuts. Perquai datti era ina gruppa da lavur “Grossraubtiere Graubünden”. A quella fan part dasper la politica represchentants da tut las gruppas d’interess che han da far cun animals da rapina gronds sco il luf. Era in represchentant dals purs è da la partida.
Las posiziuns dals purs e dal chantun
Purs - Thomas Roffler, president da l’Uniun purila dal Grischun | Chantun - Jan Boner, incumbensà chantunal per la protecziun da la scossa e pur | |
---|---|---|
1. | Il luf è protegì memia ferm. Ins duess dar liber il luf per la chatscha | Da decider sch’ins po sajettar ils lufs u betg n’è betg en nossa cumpetenza. Las leschas na savain nus dal Plantahof betg midar |
2. | Il luf chaschuna lavur e custs supplementars per ils purs. Nus stuain per exempel segirar nossas scossas pli fitg. E finalmain dovran tut las lavurs supplementaras era ina massa temp | Ina part da la lavur supplementara vegn sustegnida finanzialmain da la Confederaziun. Era nus fissan cuntents sche nus survegnissan dapli. A nus èn liads en quest senn ils mauns |
3. | Plaunet vegn tut in zic stentus. I vegnan tschertgadas soluziuns dal chantun e da la politica, dentant va tut fitg, fitg plaun. Massa plaun | Nus empruvainsa da chattar per mintga puraria ina soluziun individuala a lunga vista, e per chattar quella dovra quai pazienza |