Sco l’organisaziun da marketing Grischun Vacanzas ha communitgà, n'ha la radunanza generala da mardi anc betg pudì eleger in nov president u ina nova presidenta. Raschun per quai saja che la persuna proponida unanimamain da la suprastanza na possia betg anc vegnir numnada cun resguard sin sia situaziun professiunala actuala. Per quest motiv ha Grischun Vacanzas spustà l’elecziun sin ils 14 da zercladur. Enfin là resta Marcel Friberg president.
Avant la radunanza generala avevan las medias speculà che Ariane Ehrat savess surpigliar il presidi. Ella piglia quels dis suenter 9 onns cumià da ses uffizi sco directura da la destinaziun Engiadina San Murezzan.
Ils presidents da Grischun Vacanzas da fin qua
Num | Onns en uffizi |
Otto Töndury | 1909–1919 |
Hans Valär | 1919–1929 |
Meinrad Brütsch | 1929–1936 |
Leo Meisser | 1936–1948 |
Hans Bon | 1948–1950 |
Gion Darms | 1950–1960 |
Ettore Tenchio | 1960–1976 |
Leon Schlumpf | 1976–1979 |
Jakob Schutz | 1980–1987 |
Luregn M. Cavelty | 1987–1998 |
Christoffel Brändli | 1998–2006 |
Andreas Wieland | 2006–2012 |
Marcel Friberg | 2012-2017 |
Bun onn da gestiun
Grischun Vacanzas ha fatg in gudogn da 92’000 francs e reservas da 610’000 francs e po guardar enavos sin in onn da success. Las reservas èn prevesidas per la realisaziun da la nova strategia 2017-2020. Betg mo a reguard las finanzas èsi stà in bun onn per l’organisaziun, a la fin da l’onn han era las ultimas plazzas da lavur en connex cun la reorganisaziun savì vegnir occupadas. Da numnar è qua surtut Martin Vincenz sco CEO.
RR novitads 17:00