Mario Cavigelli maina dapi il 2010 il departament da construcziun, traffic e selvicultura. En ses otg onns sco cusseglier guvernativ ha el tranter auter gì da sa fatschentar cun la chatscha e cun ils animals da rapina sco luf ed urs. Duas tematicas fitg emoziunalas ch'han er adina puspè chaschunà critica envers il cusseglier guvernativ.
Quai na saja dentant nagin problem per el, cun quai possia el ir enturn bain. Magari saja er da star nà e conceder ch'ins haja fatg in sbagl. Quai è era capità a Mario Cavigelli: El n'aveva betg dà vinavant infurmaziuns d'in scriver da l'uffizi federal per ambient en connex cun l'iniziativa che vul abolir la chatscha supplementara. Silsuenter è el sa perstgisà en il Cussegl grond. I saja stà in sbagl politic, dentant betg in sbagl dal fatg, uschia Mario Cavigelli.
Per quai vul Mario Cavigelli s'engaschar
- plazzas da lavur en regiuns perifericas
- in tschains d'aua fair
- la chatscha sco part da l'identitad grischuna
«Ins sto colliar las regiuns»
La finamira da Mario Cavigelli per la proxima legislatura èsi da colliar las regiuns. Saja quai cun il traffic public u cun vias. Sper quai vul el garantir ina basa economica da surviver per las vischnancas en la periferia e cumbatter per plazzas da lavur en las regiuns. Sco minister d'energia vul el er s'engaschar per ch'i dat vinavant in tschains d'aua fair. Quai muntia era ch'el vegnia a cuntinuar cun las lavurs ch'el haja gia cumenzà, uschia Cavigelli.
RR actualitad 12:00