Jon Domenic Parolini è vegnì elegì avant quatter onns en la regenza ed è dapi lura schef dal departament d'economia publica e fatgs socials, che dumbra otg uffizis. En blers da quels saja da prender decisiuns cun las qualas ins na possia betg far endretg a tuts e nua ch'i dettia era critica. Quai sa chapeschia dentant da sa sez, manegia l'um oriund da Scuol.
El haja però er cuntanschì bler, per exempel enten realisar e reveder la lescha per la promoziun d'economia. Plinavant haja el er pudì acquistar per il chantun ils dretgs da construcziun sin l'areal da la resgia gronda a Domat, là nua ch'i marschava nagut.
Per quai vul Jon Domenic Parolini s'engaschar
- realisar il project da la digitalisaziun
- interess da regiuns perifericas
- collavuraziuns turisticas e nizzegiar sinergias
La digitalisaziun en il center
En l'avegnir saja da cuntinuar cun il project da la digitalisaziun ch'ins haja instradà ils davos onns. In project ch'è tenor Jon Domenic Parolini da gronda impurtanza per il Grischun. Vitiers saja da prender per mauns il problem da la disparitad en il Grischun, quella daventia pli e pli gronda tranter las regiuns: La regiun en la Val dal Rain prospereschia, il cuntrari saja il cas ora en las regiuns. Perquai vul Parolini s'engaschar ch'era las regiuns perifericas restian attractivas per che la glieud veglia vinavant abitar en quellas.
RR actualitad 12:00