Cun quest agid finanzial vul la regenza grischuna minimar il donn economic che las canortas han entras la crisa da corona, hai num en ina communicaziun.
Purschida reducida e custs fixs
Il mument è la purschida da las instituziuns sco canortas restrenschida. Ils custs fixs sco il tschains da locuziun han canortas dentant vinavant e quai chaschuna perditas finanzialas. Sustegn datti be là nua che la tgira privata n'è betg pussaivla. La mesadad da las contribuziuns vegnan finanziadas dal chantun, l'autra mesadad va sin donn e cust da las vischnancas.
Sco il cusseglier guvernativ Marcus Caduff ha declerà sin dumonda dad RTR duai quest milliun bastar per circa 3 enfin 4 mais – calculà sin fundament da l'occupaziun da las canortas. Quants daners che mintga canorta survegn dependa da l'occupaziun, tschertas hajan be pli 20% dals uffants ed autras sajan anc occupadas cun 60%.
Sustegn era per geniturs
I saja ina situaziun paradoxa, di Marcus Caduff: La Confederaziun haja appellà als geniturs da tegnair a chasa lur uffants – tuttina dentant stoppian els pajar las taxas per la canorta. Cun il sustegn finanzial veglia la regenza gulivar in zic questa malgistadad. Concret sto ina canorta demussar envers l'Uffizi social dal Grischun quants uffants che restan a chasa il mument e survegn lura pajà las contribuziuns.
Levgiament tar las canortas
Enfin uss n'hajan anc nagina canorta en il Grischun stuì serrar e tuttina saja la situaziun precara. Quai di la co-presidenta da l'Uniun per la tgira d'uffants dal Grischun Alice Bisaz envers il schurnal regiunal da radio SRF. Perquai beneventa ella il sustegn chantunal.