Il mund da las medias en la Svizra orientala saja en gronda midada ed in schurnalissem independent saja periclità tras ina collavuraziun tranter la Somedia e la Basler Zeitung. Quai scriva la PS Grischun en la communicaziun da medias. Il mument contracteschan las duas gasettas davart in mantè communabel tar ils rapports naziunals, internaziunals e la cultura.
Appel ad editur Hanspeter Lebrument
La PS Grischun appellescha ensemen cun las 18 persunas a l'editur Hanspeter Lebrument da smetter las tractativas cun la Basler Zeitung. Plinavant duaja el s'engaschar per fermas, autonomas e liberalas medias.
Basler Zeitung tutga per in terz a Christoph Blocher
Ils auturs da l'appel teman ina collavuraziun cun la Basler Zeitung, perquai che la gasetta tutga per in terz a Christoph Blocher. Plinavant haja la gasetta ina lingia populistica fitg dretga. Tenor l'appel possia il schurnalissem independent esser periclità tras pussanzas economicas.
L'editur da Somedia Lebrument prenda posiziun
La Somedia restia independenta e n'haja nagina intenziun da surdar la controlla dals cuntegns da lur gasettas en ils mauns dad exteriurs. Quai scriva la direcziun da la chasa da medias sin sia pagina d'internet e reagescha uschia sin l'appel da la Partida socialdemocratica.
Nagin sustegn da las ulteriuras partidas
Marcus Caduff, il schef da fracziun da la PCD, ha chapientscha per l'appel da la PS. Tuttina na datti nagin sustegn, perquai che la Somedia è ina fatschenta privata e possia decider sezza co agir. Quai è era l'opiniun da Bruno Claus, il president da la PLD dal Grischun.
Insumma nagina chapientscha per l'appel ha il president dal PPS dal Grischun, Heinz Brand. El na vesia nagin problem tar ina eventuala collavuraziun da la Somedia e la BaZ.
RR actualitad 17:00+