Chantun - Sutga, accordeon e Flurin Caviezel – e fatg è il «Kurzschluss»
«Kurzschluss» vul dir per rumantsch «strasarsa», di Flurin Caviezel. «Kurzschluss» è dentant er il num dal tschintgavel program dal cabarettist da Cuira. La premiera è ils 16 da matg. Cun RTR essas Vus dentant gia uss al current.
Premiera è ils 16 da matg 2017 a las 20:30. Tut las producziuns han lieu a Cuira, sin la tribuna da chasa da Flurin Caviezel, numnadamain la «Klibühni» en la citad veglia da la chapitala dal Grischun. Dentant datti er ina pitschna turnea svizra cun fermadas a Son Gagl, Basilea e Solothurn.
«Kurzschluss» datti adina puspè - saja quai en l'electronica, en l’amur u tar acziuns quotidianas malgartegiadas, di Flurin Caviezel. Quai maina tar istorgettas e quellas raquinta il cabarettist da Cuira a moda fitg divertenta.
Betg pli 21 instruments, 'mo' anc 1
Tar l'ultim program eran el anc cun 21 instruments sin tribuna. Uss è Flurin Caviezel sulet cun ina sutga ed in accordeon. Enritgì vegn il program cun diversas istorgettas persunalas à la Flurin Caviezel.
Per ch'ils visitaders bandunian sias preschentaziuns betg mo divertids ma er intimads da patratgar suenter, menziuneschia el uss er dapli politica, raquinta il cabarettist.
