Chantun - Navaglias bloccheschan pliras vischnancas en il Grischun

Curt e concis

• La via tranter Rueun e Tavanasa ha entant puspè pudì vegnir averta.
• Samignun n'è betg pli cuntanschibel pervia dal privel da lavinas.
• L'Engiadina Bassa è mo cuntanschibla sur il Veraina.
• La Val Müstair è sulet accessibla via il Tirol dal Sid.

Suenter in discurs cun la polizia chantunala da glindesdi en damaun regian cundiziuns invernalas sin las vias grischunas, quai vala era per la A13. Accidents plitost pitschens èn vegnids annunziads – cun donns da material. Tenor la polizia n'haja dentant dà nagins ferids.

Surselva

La via tranter Rueun e Danis ha entant puspè pudì vegnir averta. Il glindesdi a mezdi era la Surselva be pli da cuntanscher fin a Rueun. A Mustér n'èn pliras fracziuns betg cuntanschiblas. Territori abità è ni a Mustér ni en Tujetsch periclità.

La via tranter Mustér e Sumvitg è vegnida averta il glindesdi suenter las 16:00 fin las 18:00. Ord raschuns da segirtad vegn la via serrada durant la notg. La situaziun vegn il mardi a bun'ura evaluada da nov. La part sura da la Surselva è stada isolada dapi la dumengia saira. Anc adina serradas èn las vias da Rueun a Pigniu, tranter Versomi e Stussavgia ed en il Tujetsch il tschancun tranter Rueras e Dieni.

Lavina Matergia

Glindesdi a las 15.51 è la lavina da Matergia ida a val (video da Gerold Lutz).

Engiadina

En l'Engiadina Bassa, la Val Müstair ed il Samignun restan las vias fin almain mardi serradas. Uschia èn serradas las vias da Vinadi a Samignun, da Martina fin al cunfin cun l'Austria, dad Ardez a Ftan, tranter Brail e Susch sco er tranter Cinuos-chel e Brail. En l'Engiadina Bassa arrivan ins mo pli tras il tunnel dal Veraina e la Val Müstair è sulet accessibla via il Tirol dal Sid. Zernez è dentant puspè cuntanschibel.

Grischun central

En il Grischun central hai bain er dà ina massa naiv. Las vias han ins dentant betg stuì serrar.

Ulteriur Grischun

Era en l'ulteriur Grischun datti restricziuns da traffic; pliras vias èn serradas . Tranter auter è era la regiun da Tavau pertutgada. En il Partenz è la via d'access da Pany a St. Antönien serrada, sco era pliras vias localas.

Meds da transport publics

Causa il privel da lavinas na curseschan er ils trens da la Viafier retica per il mument per part betg. Uschia na datti tranter Glion e Mustér nagins trens. Da Glion fin Sumvitg van bus da reserva, fin Mustér n'è quai dentant betg pussaivel. Tranter Scuol e Cinuos-chel Brail resta ils traject vinavant serrà, bus da reserva van tranter Scuol e Sagliains, dentant be fin las 19.30. Tanter Landquart e Claustra curseschan ils trens tenor urari. Anc fin las 19.30 datti per viagiaturs en l'Engiadina ina colliaziun tras il Vereina fin a Saglians. Ils trajects da Filisur a Tavau sco er da Cuira ad Arosa restan serradas tut il di. Sco la Viafier retica communitgescha pon quests dus trajects puspè vegnids averts il mardi a bun'ura. Viagiants ston en mintga cas far quint cun gronds retards.

Situaziun actuala

Svizra - Anc dapli naiv en las Alps

Pervi da la blera naiv e la situaziun tendida da lavinas n'è suenter Zermatt dapi dumengia saira era Andermatt betg pli cuntanschibel ni sin via ni cun la viafier.

La vischnanca da Zermatt appellescha a tut las persunas da restar pervi dal privel da lavinas en lur chasas u da betg bandunar il center dal vitg. Il mument desist'ins era da sgols da helicopter en ils lieus betg cuntanschibels sin via u cun la viafier. Ils sgols da transport sajan stritgads pervi da la schletta vista e lavinas da pulvra, hai num sin la pagina d'internet da Zermatt Turissem.

Tenor il responsabel per privels da la natira dal Vallais spetgan els oz in di privlus per il chantun.

Fin mardi en damaun quinta SRF Meteo cun anc bler dapli naiv en las Alps. Il Vallais e las regiuns en il nord da las Alps ston spetgar 50 fin 80 centimeters. En intgins territoris hai dà fin uss gia fin a trais meters naiv. Entant crescha en la Bassa il privel d'inundaziuns e da bovas.

RR novitads 06:00