- La Lia Rumantscha vul cumbatter cunter l'iniziativa da linguas estras.
- Ensemen cun ses pendant talian realisescha ella perquai ina campagna d'infurmaziun.
- Plinavant duain las scolas medias extender la purschida dal rumanstch en scola.
A chaschun da la sessiun d'avrigl dal Cussegl Grond ha la Lia Rumantscha envidà la Gruppa rumantscha dal Cussegl Grond ad in inscunter d'infurmaziun davart l'iniziativa da linguas estras. La Lia Rumantscha sa metta cleramain cunter quella. L'iniziativa procuria clers dischavantatgs per la scola rumantscha. Pertge sche la regla da «mo ina lingua estra en la scola primara» entrass en vigur, pudessan scolars rumantschs pir cumenzar ad emprender englais sin stgalim superiur, pia quatter onns pli tard ch'ils scolars da la scola tudestga.
Dentant na chaschunass quai betg mo dischavantatgs per ils scolars, mabain manass la midada dal sistem er a grond sforzs finanzials ed organisatorics.
Sa metter ensemen cun in'autra minoritad
Medema fiss la situaziun per las scolas talianas. Perquai vul la Lia Rumantscha cumbatter ensemen cun la Pro Grigioni, ses pendant per ils da lingua taliana en Grischun. Communablamain vulan las duas organisaziuns realisar ina campagna d'infurmaziun cunter l'iniziativa che vegn probablamain en votaziun ils 23 da settember 2018.
Rumantsch sco rom facultativ en scolas medias
Plinavant propona la Lia Rumantscha d'introducir il rumantsch almain sco rom facultativ en las scolas medias grischunas. Quai per ch'ils scolars hajan la pussaivladad d'emprender rumantsch independentamain da lur domicil.
Ed i duai era esser pussaivel da far ina matura bilingua en mintga regiun rumantscha. En la Surselva obligass quai la Claustra da Mustér, en l'Engiadin'Ota è questa pretensiun gia ademplida tras l'Academia a Samedan ed en l'Engiadina bassa porscha l’institut Otalpin a Ftan gia la pussaivladad.
RR novitads 11:00