La regenza chantunala è s'exprimida cunter l'idea da stgaffir las basas legalas per in cataster da conducts unitar per l'entira Svizra. Per realisar quest cataster unitar duvrassi ina midada da la Lescha federala davart la geoinfurmaziun. L'idea per il project è vegnida dal Departament federal da defensiun, protecziun da la populaziun e sport (DDPS).
La finamira da quest cataster cun lingias sutteranas e sur terra fiss da metter a disposiziun per l'entira surfatscha da la Svizra – en moda cumpletta ed en la qualitad necessaria – las geodatas. Uschia duai vegnir augmentada la segirezza dals conducts e da las infrastructuras sutterranas en cas d'intervenziuns. Plinavant duain vegnir sustegnidas la digitalisaziun e coordinaziun en la planisaziun, en la projectaziun sco er en la construcziun.
En princip è il Chantun da l'opiniun ch'i fa senn da rimnar infurmaziuns davart il cataster da l'entira Svizra en in modell da data unitar. La regenza ha dentant grondas resalvas, ch'ils chantuns na pudessan betg ademplir las pretensiuns da quest project – ni oz ni en l'avegnir. Quellas resalvas pertutgan per exempel la qualitad e cumplettadad da las datas ch'ils chantuns stuessan pudair porscher.
Tenor il chantun tanschessi d'obligar ils chantuns da manar in cataster da conducts e da sa restrenscher a l'access central garantì.