Enfin ils 31 da matg sto il Grischun annunziar uffizialmain sia candidatura a Swiss Olympic. Per quai na dovri dentant anc nagin concept, mabain be in scriver.
Il concept è dentant era gia sin maisa ed il maina-project Andreas Wieland raquintass gugent inqual detagl tge ch'è previs per la candidatura grischuna. El saja dentant loial cun la regenza e na possia tradir nagut. Era il cusseglier naziunal Heinz Brand, che fa part da la gruppa strategica ch'accumpogna il project, fiss per dapli transparenza. La populaziun haja il dretg d'enconuscher il concept - gist per evitar ch'i dettia speculaziuns ed uschia era resistenza cunter gieus olimpics 2026 en il Grischun.
Il cusseglier guvernativ Jon Domenic Parolini conferma che la regenza tractia mardi proxim la proposta dal comité e tut tenor stoppia anc dar midadas. Tut quai sajan dentant discussiuns che stoppian capitar davos las culissas - senza publicitad.
Swiss Olimpic spetga il dossier da candidatura enfin il december. Sin l'atun vul la regenza avair pront il messadi per ch'il Cussegl grond possia tractar la dumonda ed il suveran votar il 2017.